S: Ang Sūrah Al-Qāri`āh at ang pagpapakahulugan dito:

(Sa ngalan ni Allāh, ang Napakamaawain, ang Maawain.)

1. (Ang Tagakalampag.) 2. (Ano ang Tagakalampag?) 3. (Ano ang nagpabatid sa iyo kung ano ang Tagakalampag?) 4. (Sa Araw na [iyon], ang mga tao ay magiging para bang mga gamugamong pinakalat) 5. (at ang mga bundok ay magiging para bang mga lanang nahimulmol.) 6. (Kaya hinggil naman sa sinumang bumigat [sa kabutihan] ang mga timbangan niya,) 7. (siya ay nasa isang pamumuhay na nakalulugod.) 8. (Hinggil naman sa sinumang gumaan [sa kabutihan] ang mga timbangan niya,) 9. (ang kanlungan niya ay kailaliman.) 10. (Ano ang nagpabatid sa iyo kung ano iyon?) 11. ([Iyon ay] isang Apoy na napakainit.) (Qur'ān 101:1-11)

Ang Pagpapakahulugan

1. {Ang Tagakalampag.}: Ang oras na kakalampag sa mga puso ng mga tao dahil sa kasukdulan ng hilakbot dito.

2. {Ano ang Tagakalampag?}: Ano ang oras na ito na kakalampag sa mga puso ng tao dahil sa kasukdulan ng hilakbot dito?

3. {Ano ang nagpabatid sa iyo kung ano ang Tagakalampag?}: Ano ang nagpaalam sa iyo, O Sugo, kung ano ang oras na ito na kakalampag sa mga puso ng mga tao dahil sa kasukdulan ng hilakbot dito? Tunay na ito ay ang Araw ng Pagbangon.

4. {Sa Araw na [iyon], ang mga tao ay magiging para bang mga gamugamong pinakalat}: Sa Araw na kakalampagin ang mga puso ng mga tao, sila ay magiging para bang mga gamugamong kumakalat na naglilipana dito at doon,

5. {at ang mga bundok ay magiging para bang mga lanang nahimulmol.}: at ang mga bundok ay magiging tulad ng mga lanang hinimaymay sa kagaanan ng pag-usad ng mga ito at paggalaw ng mga ito.

6. {Kaya hinggil naman sa sinumang bumigat [sa kabutihan] ang mga timbangan niya,}: Kaya hinggil naman sa sinumang tumimbang ang mga gawa niyang maayos higit sa mga gawa niyang masagwa,

7. {siya ay nasa isang pamumuhay na nakalulugod.}: siya ay nasa isang pamumuhay na kinalulugdan, na matatamo niya ito sa Paraiso.

8. {Hinggil naman sa sinumang gumaan [sa kabutihan] ang mga timbangan niya,}: Hinggil naman sa sinumang tumimbang ang mga gawa niyang masagwa higit sa mga gawa niyang maayos,

9. {ang kanlungan niya ay kailaliman.}: ang tirahan niya at pagtitigilan niya sa Araw ng Pagbangon ay Impiyerno.

10. {Ano ang nagpabatid sa iyo kung ano iyon?}: Ano ang nagpaalam sa iyo, O Sugo, kung ano iyon?

11. {[Iyon ay] isang Apoy na napakainit.}: Iyon ay isang Apoy na matindi ang init.